[轉貼]人生資本 - 港燦筆記

最重要的資本依次排列應是 (a) 誠信 (b) 人脈 (c) 常識 (d) 語文能力 (e) 專業資格 (f) 學位

1. 不少外表平凡者做起老闆來有聲有色。成功站穩住腳的全部都不是甚麼MBA。其中不乏one man band 或小貓三四隻的小公司，只要不用捱貴租和出大舊糧，公司盈利往往第一、兩年已經平手，第二、三年開始賺錢的並不罕見。

2. 有限公司股東人數愈多，公司壽命通常愈短。

3. 絕大部份情況下，當小股東 (例如只出資，不加入公司，手持10-20%)往往沒有好下場。始終會在公司賺錢時大股東覺得你坐享其成，條氣唔順；公司賠本時要你注資你又縮沙。想話事又孤掌難鳴，例如主張買部三萬幾元的影印機又被董事局「大比數」(其實只是二比一)否決。還有容易猜忌大股東如何中飽私囊，最後不歡而散。

4. 愈高學歷和在大公司浸過的愈多理論和要求。算我唔好彩：一次替一個客戶成立間公司，客都未有一個，又要 preference shares，又要搵律師搞 shareholders' agreement(報了價又嫌貴，終於沒有做)，M&A 又要大刀闊斧改到七彩(三、四稿)，仲要以資產代股本(頂! 原來係部二手電腦!)，真係被我算中，第一份Annual Return 未做就已經要申請撤銷註冊(dereg)。你幾時見過人創業都未夠三個月就搵番工?5. 香港地辦中小企不用太high tech, 最重要都仍是關係(好聽D講叫「人脈」)、EQ(巴士少男都算係咁)、少少discipline、少少勇字當頭，和在創業始時適度的成本控制。